सिरहा । असोज ६ । सिरहाको ठाडी सीमा क्षेत्रमा भारतबाट नेपालतर्फ ल्याइएको सामान भन्सार प्रक्रिया पूरा गर्न लैजाँदै गर्दा सशस्त्र प्रहरीले नियन्त्रणमा लिएर क्याम्पमा राखेको आरोपपछि घटनाको कानुनी आधार र अपनाइएको प्रक्रियामाथि प्रश्न उठेको छ।
स्थानीयका अनुसार सम्बन्धित व्यक्ति सामान भन्सार कार्यालयमा बुझाएर आवश्यक प्रक्रिया पूरा गर्ने तयारीमा रहेको अवस्थामा सीमा क्षेत्रमै सामान नियन्त्रणमा लिइएको हो। सामान अवैध वा भन्सार छलीको भए कानुनबमोजिम बरामद, मुचुल्का तथा आवश्यक प्रक्रिया पूरा गरी सम्बन्धित निकायमा बुझाउनुपर्ने भए पनि नियन्त्रणपछि के प्रक्रिया अपनाइयो भन्नेबारे स्पष्ट जानकारी नदिइएको स्थानीयको गुनासो छ।
सामान कुन कानुनी आधारमा नियन्त्रणमा लिइयो? बरामदी मुचुल्का तयार भयो कि भएन? सामान सम्बन्धित भन्सार कार्यालयमा दाखिला गरियो कि गरिएन? यस्ता प्रश्न अहिले स्थानीयस्तरमा उठिरहेका छन्।
घटनाबारे प्रतिक्रिया लिन ठाडीस्थित सशस्त्र प्रहरीका डीएसपी श्यामबाबु यादवसँग पत्रकारले सम्पर्क गर्ने प्रयास गर्दा फोनमार्फत प्रतिक्रिया प्राप्त हुन सकेन। कार्यालयमा पुगेर जानकारी लिन खोज्दा धम्कीपूर्ण व्यवहार गरिएको आरोपसमेत लगाइएको छ। यद्यपि, डीएसपी यादव तथा सम्बन्धित सशस्त्र प्रहरी कार्यालयको आधिकारिक प्रतिक्रिया यस समाचार तयार पार्दासम्म प्राप्त हुन सकेको छैन।
सीमा क्षेत्रमा चोरीपैठारी तथा अवैध ओसारपसार नियन्त्रण गर्नु सुरक्षा निकायको जिम्मेवारी भए पनि कुनै पनि सामान नियन्त्रणमा लिँदा त्यसको स्पष्ट कानुनी आधार, बरामदी विवरण, मुचुल्का र त्यसपछिको प्रक्रिया पारदर्शी हुनुपर्ने स्थानीयको माग छ।अब प्रश्न उठेको छ-यदि सामान अवैध थियो भने कानुनी प्रक्रिया के अपनाइयो? र यदि भन्सार प्रक्रिया पूरा गर्न लैजाँदै गरिएको सामान थियो भने सीमा क्षेत्रमै नियन्त्रण गर्नुको आधार के थियो?घटनाको निष्पक्ष छानबिन र सम्बन्धित निकायबाट स्पष्ट जवाफ आउनुपर्ने स्थानीयको माग छ।
_1766318749.png)
